يم العيون الزرق يا بحر كلو مواج ------ وشباك فيها السمك علقان عالهيني
أوقات فيها صفا أوقات فيها هياج ------ أوقات موج النظر بيكون غلّيني
سبحان يلي عطاكي المملكة و التاج ------ والحسن كلو إلك و الصبر عاطيني
و شّك الكواكب عا كتفيكي فواج فواج ------ عا كل ميلة من الكتفين دزيني
وسهام عينك إذا جرحت ما إلها علاج ------ حتى لو برضى أنا من الجرح تشفيني
و جبين تحتو حواجب للعيون سياج ------ كل عين تدبح دبح يا رب نجّيني
و الوج خلقة ممكيج من عدا مكياج ------ أبيّض مزّهر بلون شموع شعنيني
وشفاف حمرا و ملاني و جمرّها وهّاج ------ فيها حرقتيني و ما بدي مين يطفيني
و سنان بديو كأنن شي قطيع نعاج ------ بكير نزلو من الضيعة عالمديني
و زنود من لونها غاروا سنان العاج ------ عن كل مال الدني فيهن بتغنيني
لنو سمحيلي إذا ما كان في إزعاج ------ من ورد خدك بشي زرّين للزيني
تا قول من هالدني حقّي وصلني و حاج ------ شمّة و ضمّة من ورودك بتكفيني
----------------------------------------
موضوع: يم العيون الزرق 
30/10/2008, 3:04 am
